შეფასებისა და გამოცდების ეროვნულმა ცენტრმა (NAEC) ერთიანი ეროვნული გამოცდების აპელაციის შედეგები, ასევე აბიტურიენტების გათანაბრებული და სკალირებული ქულები გამოაქვეყნა.
„შედეგების გასაჩივრებასთან დაკავშირებით შექმნილი საგნობრივი კომისიის გადაწყვეტილება შეიძლება გასაჩივრდეს აპელაციის შედეგების გამოქვეყნებიდან ერთი თვის ვადაში თბილისის საქალაქო სასამართლოში (მის.: თბილისი, აღმაშენებლის ხეივანი №64)“, – აღნიშნულია NAEC-ის განცხადებაში.
შეფასებისა და გამოცდების ეროვნული ცენტრი განმარტავს, რომ იმ საგნებში, რომლებშიც ერთზე მეტი ვარიანტი იყო, ხდება ნედლი ქულების გათანაბრება, რის შედეგადაც, ის აბიტურიენტი, რომლის გათანაბრებული ქულაც მინიმალურ ზღვარზე მეტია, კონკურსში მონაწილეობას აგრძელებს.
„აბიტურიენტებს ვთხოვთ გაითვალისწინონ, რომ საგანმანათლებლო პროგრამების რეიტინგულ სიაში ცვლილებების შეტანის ვადა 26 აგვისტოს 18:00 საათზე იწურება“, – აცხადებენ შეფასებისა და გამოცდების ეროვნულ ცენტრში.
