რუსეთმა, რომელმაც უკანონოდ დაიპყრო ყირიმი 2014 წელს, უკრაინის ნახევარკუნძული პლანეტის ერთ-ერთ ყველაზე მილიტარიზებულ ნაწილად აქცია, – განაცხადა ნატოს გენერალურმა მდივანმა, იენს სტოლტენბერგმა „ყირიმის პლატფორმის“ მეორე სამიტზე სიტყვით გამოსვლისას.
„ვლადიმირ პუტინი ფიქრობდა, რომ მას შეეძლო უკრაინელი ხალხის და მათი შეიარაღებული ძალების გატეხვა, რომ მას შეეძლო დემოკრატიული ერების დაყოფა, რომ მას შეეძლო თავისი პირობების კარნახი, თუმცა ის შეცდა. ამ სამიტზე უკრაინის ამდენი მეგობრის ყოფნა ამას მოწმობს“, -აღნიშნა ნატოს გენერალურმა მდივანმა.
იენს სტოლტენბერგმა აღნიშნა, რომ „ომის ექვსი საშინელი თვის განმავლობაში“ უკრაინამ აჩვენა „წარმოუდგენელი უნარი გაუძლოს სასტიკ აგრესიას – უპასუხოს, დაიბრუნოს ტერიტორიები და მიაყენოს რუსეთს მძიმე დანაკარგები“.
„ნატო სრულ სოლიდარობას უცხადებს უკრაინას. მოკავშირეები სრულად უჭერენ მხარს უკრაინის სუვერენიტეტსა და ტერიტორიულ მთლიანობას, თავდაცვის უფლებას, უკრაინის უფლებას აირჩიოს საკუთარი გზა. პრეზიდენტმა პუტინმა დაიწყო ეს გაუმართლებელი ომი, მან თავად უნდა შეწყვიტოს იგი და მოაშოროს თავისი სამხედრო ძალა უკრაინის მიწას“, – განაცხადა ნატოს გენერალურმა მდივანმა.
