იმ აჟიოტაჟით, რაც ბოლო დღეებში შაქართან მიმართებაში მოხდა, მართლა გაჩნდა დეფიციტი, რომელიც სულაც არ არის საბაზრო ეკონომიკასთან დაკავშირებული. გაუგებარია ამდენი შაქრის შესყიდვა. ზაფხულში რომ ადამიანი შაქარს ყიდულობს გასაგებია, ზამთრისთვის კომპოტებს, ჯემებს აკეთებენ და ახლა შაქრით სადილობენ – ამის შესახებ პროფესორმა ლადო პაპავამ ტელეკომპანია „იმედთან“ განაცხადა.
მისი თქმით, შაქრის ექსპორტი ძირითადად ხდება ბრაზილიიდან.
„უკრაინიდან რომც შემოდიოდეს შაქარი, რამხელა მარაგი უნდა გაიკეთო? რამდენი ხანი უნდა გეყოს? როდესაც ასე იქცევი, თვითონვე იუარესებ მდგომარეობას. აცარიელებ დახლებს და მიმწოდებელმა რა ქნას? სანამ ახალ პარტიას შემოიტანს, ფასს ზრდის იმაზე, რაც აქვს. ამ შემთხვევაში ძალიან დიდი მნიშვნელობა აქვს მთავრობის სხვადასხვა სტრუქტურისა და ბიზნესსექტორის წარმომადგენლების კომუნიკაციას, საზოგადოებასთან, რომლებმაც მოსახლეობა უნდა დაამშვიდონ. მიაწოდოს ინფორმაცია იმასთან დაკავშირებით, რა სიტუაცია გვაქვს მარცვლეულის მარაგებთან, რა სიტუაცია გვაქვს შაქრის მარაგებთან, რა სიტუაციაა კვების სხვადასხვა პროდუქტთან, თუ სხვა სამომხმარებლო საქონელთან, რომლებიც ასე მნიშვნელოვანია. ამიტომ კომუნიკაცია, რომელსაც დღეს უკვე ინტენსიურად აწარმოებს საქართველოს მთავრობის სხვადასხვა სტრუქტურის წარმომადგენელი და ბიზნესსექტორიც აუცილებელია“, – განაცხადა ლადო პაპავამ.
