ახლა უკრაინაში მიმდინარეობს ცხელი ომი და ჩვენ რასაც ვხედავთ, სამწუხაროდ, საქართველოში მიდის ჰიბრიდული ომი საქართველოს ხელისუფლების წინააღმდეგ – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.
მისი თქმით, სამწუხაროდ, ისინი იმასაც ვერ აცნობიერებენ, რომ ხელისუფლების დისკრედიტებით ახდენენ ქვეყნის დისკრედიტებასაც.
„ახლა უკრაინაში მიმდინარეობს ცხელი ომი და ჩვენ რასაც ვხედავთ, სამწუხაროდ, საქართველოში მიდის ჰიბრიდული ომი საქართველოს ხელისუფლების წინააღმდეგ. ეს ძალიან სამწუხაროა. ვხედავთ ოპოზიციის ჩართულობას, რომ როგორმე მოხდეს საქართველოს ხელისუფლების დისკრედიტება და სამწუხაროდ, ისინი იმასაც ვერ აცნობიერებენ, რომ ხელისუფლების დისკრედიტებით ახდენენ ქვეყნის დისკრედიტებასაც. სამწუხარო ომია, რომელიც საკუთარ ხელისუფლებას გამოუცხადეს. ვხედავთ ჩვენ ამას, მათ შორის, როგორ ხდება წარმოჩენა საერთაშორისო პლატფორმებზე სხვადასხვა მოცემულობის იმისთვის, რომ მოხდეს ხელისუფლების დისკრედიტება“, – აღნიშნა პაპუაშვილმა.
საქართველოს პარლამენტის თავმჯდომარის თქმით, ოპოზიციის ნაწილი დაცილებულია როგორც ხალხის, ისე ქვეყნის ინტერესებს.
„სამწუხაროდ, მაშინ, როდესაც ნებისმიერ ქვეყანაში ხდება კონსოლიდირება ყველა პოლიტიკური ძალის, საქართველო გახლავთ ის უნიკალური გამონაკლისი, სადაც ოპოზიციის ნაწილი დაკავებულია იმით, რომ ხელისუფლებაში მოსვლის ვიწრო, მერკანტილური პარტიული ინტერესები ამ უსაფრთხოების რისკების ფასად დაიკმაყოფილოს. სწორედ ეს არის მაგალითი, რამდენად დაბალპატრიოტულია მათი განწყობები და რამდენად დაცილებული არიან ისინი როგორც ხალხის, ისე ქვეყნის ინტერესებს. სინამდვილეში მათ უკრაინა და საქართველო კი არ აინტერესებთ, აინტერესებთ ერთადერთი რამ – ძალაუფლება. რომ არა ეს, ისინი მონაწილეობას მიიღებდნენ იმ ფორუმებში, რომლის დელეგაციის წევრებიც არიან. არც კი ჩავიდნენ ევროკავშირის ფარგლებში გამართულ შეხვედრებში და მხარი არ დაუჭირეს განცხადებებს. სინამდვილეში ისინი მონაწილეობას მიიღებდნენ საპარლამენტო საქმიანობაში, როცა საუბრობენ ევროკავშირზე, რა მონაწილეობას იღებენ ამ კუთხით. მათ არ აინტერესებთ არც საქართველო, არც უკრაინა, არც ვინმეს ინტერესი, არც ხალხი, მათ აინტერესებთ აბსოლუტური ძალაუფლების დაბრუნება, რომელიც ჰქონდათ. ეს არის მხოლოდ ნაწილი“, – განაცხადა პარლამენტის თავმჯდომარემ.
მისივე თქმით, არც ხალხის და არც ქვეყნის ინტერესში არ არის პროპაგანდის და დეზინფორმაციის აყოლა. პაპუაშვილის განცხადებით, პროპაგანდა და დეზინფორმაცია ამ მდგომარეობაში არის სწორედ იარაღი მტრის ხელში.
„ყველა ვინც ამაშია ჩართული, ნებსით თუ უნებლიეთ, ყველა არის მტრის ინსტრუმენტი. ზოგადად, მომატებული უსაფრთხოების რისკები რომ არის ამ ქვეყანაში, სწორედ ამიტომ არის მნიშვნელოვანი, რომ ოპოზიციის ნაწილი იმით კი არ უნდა იყოს დაკავებული, როგორ აჯანჯღაროს ეს ქვეყანა, არამედ ამ შემთხვევაში, მნიშვნელოვანია, ყველა კონსოლიდირდეს ხელისუფლების გარშემო, მათ შორის მთავრობის გარშემო, რათა სიმშვიდე იყოს შენარჩუნებული“, – განაცხადა პაპუაშვილმა.
