დღეს ტრაგიკული მოვლენები ვითარდება უკრაინაში. ვგულშემატკივრობთ ჩვენს დებს და ძმებს. ვლოცულობთ, რომ მშვიდობა დამყარდეს, – სამების საკათედრო ტაძარში საკვირაო წირვა პატრიარქის მოსაყდრემ, მეუფე შიომ აღავლინა და ქადაგებისას უკრაინაში მიმდინარე მოვლენებს გამოეხმაურა. საპატრიარქოს ინიციატივით, დღეიდან ყველა ტაძარში უკრაინელი ხალხისთვის შეგროვდება შემოწირულობები, რაც საბოლოოდ ჰუმანიტარული დახმარების სახით გაიგზავნება.
„კათოლიკოს-პატრიარქ ილია მეორის ლოცვა-კურთხევით დაიწყო ჰუმანიტარული დახმარების შეგროვება, ჩვენს სამღვდელოებაში და მრევლში არის ინიციატივა, რომ დავეხმაროთ იმ უკრაინელ მოქალაქეებს, რომლებიც დარჩნენ საქართველოში, ჯერჯერობით ვერ ბრუნდებიან თავის სამშობლოში და იმედია, ღვთის წყალობით, ეს განხორციელდება“, – განაცხადა მეუფე შიომ.
