ამირან გამყრელიძე მიმდინარე კვირის განმავლობაში ინფიცირების კლებას პროგნოზირებს – როგორც დაავადებათა კონტროლის ეროვნული ცენტრის ხელმძღვანელმა უწყებათაშორისი საკოორდინაციო საბჭოს დასრულების შემდეგ გამართულ ბრიფინგზე აღნიშნა, ქვეყანა „ომიკრონის” პიკის ფაზიდან გამოსვლას იწყებს.
როგორც გამყრელძე ამბობს, ქვეყანაში ინფიცირების შემთხვევების 95% სწორედ „ომიკრონის” შტამია და „დელტა” ან სხვა შტამები მხოლოდ ერთეულ შემთხვევაში ვლინდება.
„ბოლო დღეების ეპიდსიტუაციის მაჩვენებლები – განსაკუთრებით რეპროდუქციის ინდექსი, ასევე ახალი შემთხვევების რაოდენობა 100 000 მოსახლეზე და სხვა დადებითობის მაჩვენებლები იკლებს. ყოველივე ეს მიუთითებს, რომ ჩვენ გადავდივართ „ომიკრონის” ტალღის პიკს და ვფიქრობთ, რომ ამ კვირის განმავლობაში შემთხვევების რაოდენობის კლება უნდა გვქონდეს. თუმცა, შესაძლებელია ეს გახანგრძლივდეს გარკვეული პერიოდის განმავლობაში, რამდენიმე მიზეზის გამო. დღეს ქვეყანაში 95% „ომიკრონია”, ერთეულ შემთხვევებში გვაქვს „დელტა”, ან სხვა შტამები. „ომიკრონის ქვეშტამებიდან დომინანტურია მისი მეორე შტამი – BA 2, ის შედარებით მეტი გადამდებლობით ხასიათდება, მაგრამ აგრესიულობა მომატებული არ არის. ზოგადად, „ომიკრონისთვის დამახასიათებელ თვისებად გამოვლინდა, რომ კლინიკურად შედარებით მსუბუქი მიმდინარეობით ხასიათდება, მაგრამ რადგან მოკლე პერიოდში დიდი რაოდენობით ადამიანების ინფიცირება ხდება, ამას კუმულაციური ეფექტი აქვს”, – აღნიშნა ამირან გამყრელიძემ.
