-ამირან, რამდენიმე დღის წინ, უცნაურ ვითარებაში დაიწვა თქვენი დედის ოჯახში სახლის დამხმარე ფართი. დედათქვენი- ნათელა ბორჩაშვილი, ამას მიზანმიმართულ შურისძიებას და ანგარიშსწორებას უწოდებს. ამბობს, რომ თქვენს ოჯახს ემუქრებიან და მას არ ჰპატიობენ, რომ ის ლევანის დედაა, ანუ უფრო კონკრეტულად რომ გითხრათ, მედიასთან მან თქვა ინტერვიუს დროს, რომ მას თქვენი ემიგრაციაში წასული ძმის გამო სჯიან და ასევე საფრთხის ქვეშ ხართ თქვენც. რა შეგიძლიათ მოჰყვეთ ამ ხანძარზე?
– პირველი – ის ხანძარი არ იყო მარტო დედას ეზოს დამხმარე ფართი, გადავრჩით ჩვენც და სოფელიც. შეიძლებოდა ის ცეცხლი მინდორს და ტყესაც მოჰკიდებოდა. რაც შეეხება დედაჩემის- ნათელა ბორჩაშვილის განცხადებას, დედა სიმართლეს ამბობს. კი მე შემხვდნენ პარასკევს ლოცვის შემდეგ მეჩეთის მიმდებარე ტერიტორიაზე ადამიანები, რომელთაც გამაფრთხილეს, რომ ლევინს შესაძლო დაბრუნების შემდეგ ცუდი შედეგი დადგებოდა…
– უფრო რომ დავაკონკრეტოთ, რატომ ემუქრებიან თქვენს ძმას ან რატომ წავიდა ის ემიგრაციაში?
– ყველას ახსოვს, ჩემი ძმა განსაკუთრებულად გამოირჩეოდა ადამიანის უფლებების დაცვის კუთხით, მას თავისი მწვავე შეხედულება და დამოკიდებულება აქვს ასევე რუსეთის ფედერაციის მიმართ. თუმცა, რუსეთის მხარდამჭერები და რუსული სპეცსამსახურები არ ისვენებენ არც ახლა, არც ადრე. ამიტომ, ძალიან ხშირად ლევან დაუშვილს ურთულდებოდა საქმეები. ბევრი ადამიანი გამოიცნო მან, ვინც რუსულმა სპეც სამსახურებმა მიუგზავნეს.
– და ამიტომ წავიდა? თუ მიმართა სამართალდამცავებს?
– უხერხულია ეს კითხვა თავად. იცით, რა მოხდა მის წასვლამდე რამდენიმე ხნით ადრე? ერთ- ერთი სატელევიზიო ეთერის შემდეგ ძალოვნებმა ჩემი ძმა გადაიყვანეს თელავის პროკურატურაში და დაემუქრნენ, თუ კიდევ გაბედავდა ხელისუფლების კრიტიკას ტელევიზიით ან საჯაროდ ხალხში, მას აუცილებლად დასჯიდნენ და სახელმწიფო მას აღარ დაიცავდა რუსი სპეცსამსახურების კონტროლისაგან, პირიქით, თავად სამართალდამცველებმა უთხრეს, რომ თუ ჭკვიანად არ იქნებოდა რომელიმე რუსი სნაიპერის ტყვია მოხვდებოდა მას. ეს რას ნიშნავს? ეს ლევანისთვის უკვე გადამწყვეტი იყო… ყველაფერსაც ხომ ვერ მოჰყვება კაცი? შენს სახელმწიფოში რომ შენი მტერი სახელმწიფოს სპეცსამსახურმა იცის ყველა ნაბიჯი, გადაადგილება როგორ უნდა იგრძნო თავი მშვიდად? და ხანძარი გიკვირთ? ყველა რომ არ ამოგვწვეს მე ეგ მიკვირს.
– რა ურთიერთობა ჰქონდა ლევანს პანკისელ ზელიმხან ხანგოშვილთან რომელიც რამდენიმე წლის წინ მოკლეს?
– ზელიმხანს დაურეკა და მოუყვა ლევანმა აი ეგ ამბავი, როცა დაიბარეს პროკურატურაში. და მან ურჩია რომ წასულიყო ქვეყნიდან… იყო პერიოდი, როცა ხანგოშვილებთან ერთად ცხოვრობდა ევროპაშიც…
– იცით რა არის უცნაური? ახლა რატომ გაახსენდათ თქვენი ძმის მტრებს ეს ამბავი? აქამდე არ დაგმუქრებიან?
– ხეობაში იყო ასეთი ინფორმაცია გავრცელებული ახლაც გავრცელებულია თითქოს ლევანი ბრუნდება აქ უკან… სწორედ ეს გახდა მათი შიშის მიზეზიც. არც მათ უნდათ თავის ატკივება, არც მე მინდა ძმის დაკარგვა.
– თქვენ საფრთხეს რამდენად სერიოზულად აღიქვამთ?
– იმდენად სერიოზულად ვთვლი, რომ სასიცოცხლოდ მნიშვნელოვანი პრობლემის წინაშე ვრჩებით.
– გაქვთ სახალხო დამცველის იმედი?
– სახალხო დამცველი ციხეში მყოფ საქართველოს მესამე პრეზიდენტის უფლებებს ვერ იცავს რომ წამალი ჰქონდეს და ექიმი ჰყავდეს… და მე და ჩემს ოჯახს დაგვიცავს?
P.S. რამდენიმე დღის წინ, პანკისის ხეობის სოფელ წინუბანში ხანძარი იყო, სადაც დაზარალებული ნათელა ბორჩაშვილი ამბობდა, რომ მას გამიზნულად გადაუწვეს სათავსოები, საქონელი და პირუტყვის კუთვნილი საკვები.
27.11.2021წ.
