საქართველო კორონავირუსის მეხუთე ტალღის პიკის მოლოდინშია. ექიმები შიშობენ, რომ მალე საავადმყოფოებში თავისუფალი საწოლები აღარ იქნება.
იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძე აცხადებს, რომ გრიპითა და კორონავირუსით ერთდროულად ინფიცირებული პაციენტების გართულებების, ჰოსპიტალიზაციისა და მძიმე მიმდინარეობის რისკები ძალიან მაღალი იქნება. მედიკოსის თქმით, აღნიშნული პერიოდი შესაძლოა ნოემბრის პირველივე ნახევრში დაიწყოს.
„ადამიანი, რომელიც ერთდროულად იქნება ინფიცირებული გრიპითა და კორონავირუსით, ამ ადამიანებში გართულებების, საავადმყოფოში მოხვედრისა და მძიმე მიმდინარეობის რისკები ძალიან მაღალია. ეს პერიოდი ჩვენ სავარაუდოდ შესაძლებელია დაგვეწყოს ნოემბრის პირველი ნახევრიდანვე, ვინაიდან სწორედ ნოემბერი-მარტი არის საქართველოში რესპირაციული ვირუსული ინფექციების მატების პერიოდი, ამიტომ ვთვლით, რომ გრიპის ვაქცინაცია აუცილებელია, განსაკუთრებით ეს ეხება რისკის ჯგუფებს. გრიპის ვაქცინა ირიბად იცავს კორნავირუსით ინფიცირებისგან“, – განაცხადა ივანე ჩხაიძემ.
