პანდემიით დაზარალებული ბიზნესები და ადამიანები, ვინც სარგებლობენ სახელმწიფო ქონების იჯარით, ქირის უფლებით ან მართვის უფლებით აქვს გადაცემული სახელმწიფო ქონება და შესაბამისი ხელშეკრულება დადებული აქვს „ქონების მართვის სააგენტოსთან“, საგადასახადო შეღავათით ისარგებლებენ, – ამის შესახებ ეკონომიკის მინისტრმა ნათია თურნავამ, მთავრობის სხდომის დასრულების შემდეგ განაცხადა.
„საქართველოს პარლამენტმა იმსჯელა ამასთან დაკავშირებით და მიიღო შესაბამისი ცვლილებები „საერთო ქონების შესახებ“ კანონში. ჩვენ კი ამ ცვლილებიდან გამომდინარე მოვამზადეთ სპეციალური წესი, რომლითაც განისაზღვრა, რომ 2020 წლის 21 მარტიდან 2021 წლის 21 მარტის ჩათვლით, ასეთ სუბიექტებს, ფიზიკურ და იურიდიულ პირებს, ეპატიებათ იჯარის და ქირის გადასახადი, ასევე გადაუხდელობით და დაგვიანებით გადახდით ამ პერიოდში დარიცხული სანქცია-საურავი“, – აღნიშნა თურნავამ.
მისი თქმით, ჯამში საუბარია ქირაზე, იჯარაზე, რომლის მართვის საზღაური 5 მილიონ ლარზე მეტია. ამას ემატება გადაუხდელობიდან დაგვიანებით დარიცხული ჯარიმა მილიონი ლარი, რომელიც ასევე ეპატიება ამ სუბიექტებს.
„ეს გამომდინარეობს იმ სირთულეებიდან, რაც თავს დაატყდა ქვეყანას, ბიზნესებს, ადამიანებს, რაც აისახა მათ გადახდისუნარიანობაზე. ამან შეაფერხა იგივე საერთო ქონებით მოსარგებლე მოიჯარე-მოქირავნეების შესაძლებლობები, რომ დროულად გადაეხადათ სახელმწიფოს სასარგებლოდ იჯარა და ქირა. მათ ამის შესაბამისად დაეკისრათ ჯარიმები. რომ დავიცვათ სამართლიანობა, საგადასახადო შეღავათი ვრცელდება იმ მოიჯარეებზე, ვინც სრულად ან ნაწილობრივ გადაიხადა გადასახადი. მათ მომავალში ეს შეღავათი ჩაეთვლებათ გადახდილად, ანუ ამ შეღავათით ისარგებლებენ მომავალ გადახდებში, რაც აბსოლუტურად სწორია“, – აღნიშნა თურნავამ.
