საქართველოს მოქალაქემ, რომელიც შეიხის სახლში დამლაგებლად მუშაობდა, მას 2,6 მილიონი დოლარი და 4 კგ ოქრო მოჰპარა. ადგილობრივი მედიის ცნობით, შემთხვევა ერაყის ქურთისტანის ქალაქ დუჰოკში მოხდა.
მედიის ცნობით, ქალმა დანაშაული კიდევ 3 ადამიანთან ერთად დაგეგმა. სახლში დაბრუნებულმა ბიზნესმენმა და მისი ოჯახის წევრებმა ქურდობის კვალი აღმოაჩინეს, ეჭვი კი დამლაგებელზე იმის გამო მიიტანეს, რომ ის სახლიდან გაიქცა.
სამდღიანი ძებნის შემდეგ პოლიციამ დაადგინა, რომ ქალმა ერაყი დატოვა და თურქეთში გაემგზავრა, თან კი 20 000 დოლარი წაიღო. გამოძიების ფარგლებში გამოიკითხა 20-მდე ადამიანი, რომლებსაც ქართველ ქალთან ჰქონდათ კავშირი, რის შემდეგაც 3 მათგანი ქურდობაში თანამონაწილეობაში დაადანაშაულეს.
დაკავებულებმა პოლიციას მოპარული ფულისა და ძვირფასეულობის დიდი ნაწილი დაუბრუნეს, ქართველი ქალი კი ამ დრომდე თავისუფალია.
