ვაკეში კრიმინალური გარჩევა მოხდა. ყოფილ შინაგან საქმეთა მინისტრსა და „მხედრიონის” დაჯგუფების ყოფილ ხელმძღვანელზე, თემურ ხაჩიშვილზე სავარაუდო თავდასხმის მცდელობის ფაქტზე გამოძიება უკვე დაწყებულია. საქმის ფარგლებში გამოკითხულია როგორც სავარაუდო თავდასხმის ობიექტი, ისე, სავარაუდო თავდასხმაში მონაწილე პირები. ინფორმაციას ტელეკომპანია „რუსთავი 2“ ავრცელებს.
მათი ინფორმაციით, თავდასხმის მცდელობა, ვაკეში, შატბერაშვილის ქუჩაზე, თემურ ხაჩიშვილის მეგობრის ოფისში მოხდა, სადაც ყოფილი შს მინისტრი გუშინ მთელი დღის განმავლობაში იმყოფებოდა. ოფისთან 12-მდე საკმაოდ აგრესიული პირი იმყოფებოდა, ერთ-ერთი სავარაუდო თავდამსხმელი კი საკუთარ სახელსა და გვარსაც ყვიროდა.
