კულტურის მინისტრის ინიციატივით, შალვა ამირანაშვილის სახელობის ხელოვნების მუზეუმის აღდგენა იწყება. ამის შესახებ საქართველოს კულტურის, სპორტისა და ახალგაზრდობის მინისტრმა, თეა წულუკიანმა შალვა ამირანაშვილის სახელობის ხელოვნების მუზეუმში გამართულ ბრიფინგზე განაცხადა.
„დღეს ჩვენ მნიშვნელოვანი დღე გვაქვს კულტურის სამინისტროში, რადგან გადავწყვიტეთ, შევეჭიდოთ დიდ საშვილიშვილო საქმეს, რომელშიც იმედი გვაქვს, ჩვენს საზოგადოებასთან ერთად, წარმატებას მივაღწევთ. დღეს, შალვა ამირანაშვილის სახელობის ხელოვნების მუზეუმის აღდგენა იწყება. მრავალი წელია, ეს მუზეუმი აღარ არსებობს, ის დაკეტილია. არადა, ამ მუზეუმში თავის დროზე ჯამში 140 ათასამდე უნიკალური ექსპონატი იყო დაცული. პირველი ამოცანა ფონდების აღრიცხვა, დადარება და იმის დადგენა იქნება, თუ რა ჩაბარდა იმ სამუშაო ჯგუფს, რომელიც მუზეუმის აღდგენის სამოქმედო გეგმაზე იმუშავებს“, – განაცხადა თეა წულუკიანმა.
