ნიკა მელია თუ ფიქრობს, რომ მისი ღირსება უფრო მაღლა დგას, ვიდრე საქართველო და სტაბილურობა, კი ბატონო, ცოტა ხანი იქნება, ამნისტიის კანონი დამტკიცდება და შემდეგ უკვე ამნისტიით ეპატიება ის სავარაუდო დანაშაული, რომელიც მან ჩაიდინა, – ამის შესახებ საპარლამენტო უმრავლესობის წევრმა, შალვა პაპუაშვილმა ორბელიანების სასახლეში ევროპული საბჭოს პრეზიდენტის, შარლ მიშელის პატივსაცემად გამართული ვახშმის შემდეგ ჟურნალისტებს განუცხადა.
მისი თქმით, ორბელიანის სასახლეში ცალსახად ითქვა, რომ ამნისტიის კანონის ერთობლივად ინიცირება მოხდება.
„პოლიტპატიმრები საქართველოში არ არიან. რაც შეეხება კონკრეტულ სისხლის სამართლის საქმეებს, იყო სხვადასხვა კითხვა, რომ შემოვა თუ არა ოპოზიცია, ჯერ უნდა უნდა გამოვიდეს ნიკა მელია თუ არა. დღეს აქ აშკარად და ცალსახად ითქვა, რომ მოხდება ამნისტიის კანონის ერთობლივად ინიცირება, ისინი მოვლენ პარლამენტში იქნება ერთობლივი ინიციატივა და ერთობლივად მიღებული ამნისტიის კანონი. შეთანხმებაზე ხელი მოწერილი აქვთ და ამ შეთანხმების მიხედვით ყველა იწყებს პარლამენტში მუშაობას. პროცედურა, რასაც ითვალისწინებს, იმის მიხედვით იქნება. მთავარია, რომ ინიცირება მოხდება უკვე სამშაბათს, შესაბამისად, არანაირი წინაღობა არ არსებობს, ეს კანონი იყოს მიღებული, მით უმეტეს, რომ არსებობს საერთო თანხმობა, ეს ერთობლივად იქნება მიღებული“, – განაცხადა პაპუაშვილმა.
მისივე თქმით, ევროკავშირი თუ გადაიხდის გირაოს, ნიკა მელიას ნებისმიერ მომენტში შეუძლია, საპატიმროდან გამოვიდეს. რაც შეეხება მსჯავრდებულ გიორგი რურუას, პაპუაშვილის განცხადებით, კანონპროექტის ინიცირების შემდეგ, პრეზიდენტი შეწყალების აქტს გამოსცემს.
„მას თუ ეჩქარება თავისუფლებაზე გამოსვლა, გირაო გადაიხდება ევროკავშირის მიერ და ეს გზა არსებობს. მას შეუძლია გამოვიდეს. ის თუ ფიქრობს, რომ მისი ღირსება უფრო მაღლა დგას, ვიდრე საქართველო და სტაბილურობა, კი ბატონო, ცოტა ხანი იქნება, ამნისტიის კანონი დამტკიცდება და შემდეგ უკვე ამნისტიით ეპატიება ის სავარაუდო დანაშაული, რომელიც მან ჩაიდინა. რაც შეეხება რურუას, სამშაბათს, ინიცირების შემდეგ პრეზიდენტი გამოსცემს შეწყალების აქტს. ამნისტია კი შეეხება 20 ივნისთან დაკავშირებულ ყველა სისხლის სამართლის საქმეს“, – განაცხადა პაპუაშვილმა.
