ინფექციონისტი მაია ბუწაშვილის თქმით, ვაქცინაციამდე გამოკვლევების ჩატარება რეკომენდებული არ არის და ლაბორატორიების მიერ მოქალაქეებისთვის გამოკვლევების „პრევაქს პანელის” შეთავაზება არასწორია.
„მედიცინაში არ არსებობს მცნება ლაბორატორიული გამოკვლევების „პრევაქს პანელი“. არავითარი ვაქცინამდელი გამოკვლევების ოფიციალური რეკომენდაცია არც ერთი საერთაშორისო თუ ადგილობრივი ორგანიზაციის მიერ არ გაცემულა. თუ ადამიანს გეგმიურად რაიმე პროფილაქტიკური გამოკვლევების ჩატარება სურს, ეს მისი ნებაა და ვერავინ აუკრძალავს, მაგრამ ასე საყოველთაოდ ამის რეკლამირება, სახელის ფორმალიზება (პრევაქსი), რაც ადამიანებს უჩენს იმის განცდას, რომ ანალიზების ამ ერთობლიობას მართლა რაიმე ოფიციალური სახელი ჰქვია და სამედიცინო საფუძველი აქვს, რბილად რომ ვთქვათ, არასწორია და ზოგიერთი ჩვენი თანამოქალაქისთვის შეიძლება სერიოზული ფინანსური ტვირთი იყოს, თანაც სრულიად არასაჭირო“, – წერს ბუწაშვილი.
კორონავირუსის ვაქცინაციამდე თითქოსდა საჭირო ანალიზების ჩატარებას საქართველოს მოქალაქეებს რამდენიმე ლაბორატორია სთავაზობს.
