თუ ახლა არ დავიჭირეთ ეს ეპიდსიტუაცია და თუ აპრილში ხელიდან გაგვექცა, გამეორდება ისევ ნოემბერი და დეკემბერი, იმდენი მსხვერპლით, რაც ჩვენ ამ ორ თვეში გვქონდა, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.
მისი თქმით, ყველამ უნდა დაიცვას ის წესი, რომ ადამიანების დიდი რაოდენობა არ შეიკრიბოს.
„უნდა დავიცვათ ყველამ ის წესი, რომ არ შეიკრიბოს ადამიანების დიდი რაოდენობა, იქნება ეს ქორწილები თუ ჭირის სუფრები. ძალიან ბევრი ვიდეო გამომიგზავნეს ადამიანების შეკრების შესახებ. კარგია, როდესაც ახალგაზრდები იკრიბებიან სადმე, სხვადასხვა დაწესებულებასა თუ ღამის კლუბში, მაგრამ დიდი შეკრებები და დროსტარება, აპრილში მიგვიყვანს ისევ ძალიან ცუდ ვითარებამდე. თუ არ დავიჭირეთ ახლა ეს ეპიდსიტუაცია, არადა სტაბილიზებული იყო და თუ აპრილში ხელიდან გაგვექცა, გამეორდება ისევ ნოემბერი და დეკემბერი, იმდენი მსხვერპლით, რაც ჩვენ ამ ორ თვეში გვქონდა“, – განაცხადა ამირან გამყრელიძემ.
