ქვეყნის 6 კლინიკაში დღეს დაიწყო „ფაიზერის“ აცრები. ადამიანები აქტიურობენ, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საკოორდინაციო საბჭოს სხდომის დასრულების შემდეგ გამართულ ბრიფინგზე განაცხადა.
„გუშინაც უკვე „ ასტრაზენეკაზე“ გაიზარდა მოთხოვნა. თუ ორი დღის წინ 60 ადამიანი აიცრა ამ ვაქცინით, გუშინ ეს მაჩვენებელი 700-მდე გაიზარდა, მაგრამ ეს მაჩვენებელი ცოტაა. დღეში სულ ცოტა 3 000 ადამიანი მაინც უნდა აიცრას მარტ-აპრილ-მაისში, რომ ნაწილობრივი, კუმულაციური საზოგადოებრივი იმუნიტეტი შეიქმნას. ეპიდემიის დამარცხება გადის ვაქცინაციაზე“, – აღნიშნა გამყრელიძემ.
ამასთან ამირან გამყრელიძემ აღნიშნა, რომ 14 095 ადამიანია ჩაწერილი აცრებზე.
„მეტი აქტივაცია გვჭირდება, რომ ვაქცინაცია გააქტიურდეს“, – აღნიშნა გამყრელიძემ.
