ახალციხეში, ვაქცინაციის შედეგად გარდაცვლილი მედდას ოჯახი ამბობს, რომ ამ ეტაპზე საგამოძიებო უწყებას ენდობიან და გამოძიების შედეგებს ელოდებიან. პროცესში ოჯახის მოთხოვნით დამოუკიდებელი ექსპერტებიც ჩაერთვებიან.
როგორც გარდაცვლილი მეგი ბაქრაძის ბიძა აცხადებს, ოჯახს პრეტენზია კლინიკასთან აქვს და ძირითადად, კლინიკის მიერ დაშვებულ შეცდომებზე საუბრობენ.
„რასაც ვფიქრობთ, ეს დაზუსტდეს ყველაფერი, რომ კლინიკაში შეცდომები დაუშვეს ამასთან დაკავშირებით. მე არ ვამბობ, რომ ეს ვაქცინა არ უნდა გაკეთდეს, მაგრამ უნდა გაკეთდეს უსაფრთხოდ. გამოძიება რაღაც-რაღაცებს დაადგენს. ჯერ არ გვაქვს უნდობლობის განცდა, მაგრამ თუ შევამჩნევთ, რომ უნდობლობა გამოიხატება, მაგასაც ვიტყვით. პრეტენზია ძირითადად კლინიკასთან დაკავშირებით გვაქვს, მაგრამ პირადად რომელიმე პიროვნებასთან პრეტენზია ჯერჯერობით არ გაგვაჩნია. ვფიქრობთ, რომ იქ თვითონ პროცესი წარიმართა არასწორად“, – განაცხადა გარდაცვლილი ექთნის, მეგი ბაქრაძის ბიძამ.
