საფრანგეთის ყოფილმა პრეზიდენტმა, ნიკოლა სარკოზიმ, რომელიც სასამართლომ კორუფციასა და გავლენით ვაჭრობაში დამნაშავედ ცნო, განაცხადა, რომ პოლიტიკაში დაბრუნების სურვილი არ აქვს.
„სამწუხაროდ, შეჩვეული ვარ ამ შევიწროებას. ათი წლის განმავლობაში მნიშვნელოვანი რესურსები იქნა გამოყენებული, ათობით მოსამართლე, ათობით პოლიციელი, სასამართლო ზომები, რათა ჩემს გასაკიცხად რამე ეპოვათ“, – აღნიშნა ნიკოლა სარკოზიმ ტელეარხ TF1-თან ინტერვიუში.
ნიკოლა სარკოზიმ ასევე განაცხადა, რომ ის ადამიანია, რომელიც არასდროს გაურბოდა პასუხისმგებლობას.
„თავს არ ჩამოვწევ, რადგან იმის გამო მკიცხავენ, რაც არ ჩამიდენია. ეს უსამართლობაა, მე ბოლომდე ვიბრძოლებ, რათა ჭეშმარიტებამ იზეიმოს. მე ამას მხოლოდ საკუთარი თავისთვის არ ვაკეთებ, არამედ იმიტომ ვაკეთებ, რომ ვინც გვიყურებს, უნდა იცოდეს, რომ რაც მე მემართება, შეიძლება რომელიმე ჩვენგანს დაემართოს“, – განაცხადა ნიკოლა სარკოზიმ.
ცნობისთვის: პარიზის სასამართლომ ნიკოლა სარკოზი დამნაშავედ ცნო კორუფციასა და „გავლენით ვაჭრობაში“. სასამართლომ მას 3 წლით თავისუფლების აღკვეთა მიუსაჯა. აქედან ორი წლით თავისუფლების აღკვეთა პირობით სასჯელს გულისხმობს.
