„მივდივართ სტაბილიზაციისკენ, რაც ძალიან კარგია, მაგრამ ეს „თავში არ უნდა აგვივარდეს“

მივდივართ სტაბილიზაციისკენ, რაც ძალიან კარგია, მაგრამ ეს „თავში არ უნდა აგვივარდეს“ და ფრთხილად უნდა ვიყოთ, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ საკოორდინაციო საბჭოს დასრულების შემდეგ ბრიფინგზე განაცხადა.

მისი თქმით, ზოგ ქვეყანაში ვაქცინაციის მიუხედავად, ინფიცირების მაღალი მაჩვენებელი ფიქსირდება და მიზეზი რეგულაციების შეუსრულებლობაა

„ერთ-ერთი ყველაზე წარმატებული ქვეყანა, ისრაელი, რომელმაც დღეს, ყველაზე მეტი ადამიანი 100 მოსახლეზე აცრა, რომელმაც ასევე ორი აცრით აცრა სადღაც მოსახლეობის 38 პროცენტი, მიუხედავად ამისა ისრაელში ახალი შემთხვევების რიცხვი ყოველდღიურად მაინც 4 ათასია, ამიტომ ძალიან გამკაცრებულია ყველა რეკომენდაციაზე აღსრულების კონტროლი. რადგან ვაქცინაცია ახალ შემთხვევათა რიცხვზე მოქმედებს შორსვადიან პერსპექტივაში, მაგრამ ახლო ვადიან პერსპექტივაში ის გარკვეულად ამცირებს ჰოსპიტალიზაციასა და გართულებებს. ვაქცინაციასთან დაკავშირებით ხშირად არის კითხვა, რომ თითქოს რომ დაიწყებ მეორე და მესამე დღეს ეფექტი ექნება – არა, იმუნიტეტის გამომუშავებას გარკვეული პერიოდი სჭირდება და უნდა შეიქმნას კუმულუაციური იმუნიტეტი, რომ ამან შედეგი მოგცეს. ამიტომ პრევენციული ღონისძიებების დაცვა აუცილებლად კარგა ხანს დაგვჭირდება. მივდივართ სტაბილიზაციისკენ, რაც ძალიან კარგია, მაგრამ ეს „თავში არ უნდა აგვივარდეს“ და ფრთხილად უნდა ვიყოთ“, – განაცხადა ამირან გამყურელიძემ.