ქვეყანაში ვაქცინის შემოტანის სამი გზა არსებობს, გვაქვს მოლოდინი, რომ კოვიდვაქცინის შემოტანის ვადა მარტს არ გადასცდება, – ამის შესახებ ჯანდაცვის მინისტრის მოადგილე თამარ გაბუნიამ საკოორდინაციო საბჭოს დასრულების შემდეგ გამართულ ბრიფინგზე განაცხადა.
„ესაა „კოვაქსის“ პლატფორმა, ბილატერალური მოლაპარაკება და ევროკავშირთან თანამშრომლობა. ეს სამივე გზა დღეს ძალიან აქტიურ ფაზაშია. ჩვენ როგორც კი გვექნება დამატებითი ინფორმაცია ბილატერალური შეთანხმებისა ან ევროკავშირის მხრიდან რაიმე კონკრეტული დაპირებისა და შეთანხმების შესახებ, ამასაც გაცნობებთ“, – აღნიშნა გაბუნიამ.
ამასთან, თამარ გაბუნიას განმარტებით, მარტის ბოლომდე ქვეყანაში „ასტრაზენეკას“ ვაქცინის შემოტანა უნდა დასრულდეს.
„კოვაქსი“ მიუთითებს, რომ ქვეყანაში „ასტრაზენეკას“ ვაქცინა უფრო ადრე შემოვა, ვიდრე „ფაიზერის“. ეს ვადა დადასტურდება მას შემდეგ, რაც „ფაიზერთან” პირობებზე შევთანხმდებით. მოლოდინი გვაქვს, რომ ქვეყანაში ვაქცინის შემოტანის ვადა მარტს არ გადასცდება, ვფიქრობ, რომ ამ შემთხვევში სამივე მხარე შეასრულებს თავის ვალდებულებას“, – აღნიშნა გაბუნიამ.
