დილის 7:30-ზე „ნაციონალური მოძრაობის“ ოფისში სამართალდამცველები გამოჩნდნენ. მათ მალე სპეცრაზმიც შეუერთდა. დაკავებულია პარტიის ლიდერი ნიკა მელია. შენობის რამდენიმე ოთახში გაუშვეს სავარაუდოდ წიწაკის გაზი.
სამართალდამცველებმა მოქალაქეებს მოუწოდეს გაეთავისუფლებინათ პარტიის შენობა, უარის შემდეგ კი შენობაში შევიდნენ. მათ ოპოზიცია ხელაწეულები დახვდა. შენობის ალყის შემდეგ საპოლიციო ძალები ყველა სართულზე განლაგდნენ. შენობიდან გაუშვეს მედია, თუმცა იქ ბოლომდე რჩებოდნენ ნიკა მელიას მხარდამჭერები და აქტივისტები.
მხარდამჭერებს დაკავებამდე მიმართა პარტიის თავმჯდომარემ ნიკა მელიამ და მათ არაძალადობრივი წინააღმდეგობისკენ მოუწოდა.
„ჩვენ გვიპირისპირდება რეჟიმი, არანაირი ხელისუფლება, მთავრობა. ეს ადამიანები აქ მოვლენ, დღეს იქნება თუ ხვალ, მოვლენ. თავისუფლებამოყვარულ ხალხთან მოვლენ მონები. მოვლენ მონურ მორჩილებაში მყოფი ხალხი. ნიღბებით, ცრემლმდენი გაზით, ალბათ, ხელკეტებით და სხვადასხვა აღჭურვილობით. მე მინდა გთხოვოთ, რომ მათი გამოჩენისთანავე ჩვენ მათ დავუპირისპიროთ ბევრი ტაში, სიმღერა, ოვაცია და ასე მთელ მსოფლიოს დავანახოთ, რომ ერთ მხარეს დგას თავისუფალი ქვეყნის თავისუფლებამოყვარული ქართველი ხალხი და მეორე მხარეს – ივანიშვილი, ღარიბაშვილი“, – თქვა მან.
