ეს იყო მელიას ტესტი, რომელიც სახელმწიფომ ხუთიანზე ჩააბარა, – ასე გამოეხმაურა ნიკა მელიას დაკავებას ექსპერტი დავით ქართველიშვილი. როგორც ქართველიშვილმა POSTV-ის ეთერში განაცხადა, კანონის უზენაესობამ იზეიმა.
„მე ამას სპეცოპერაციას არ დავარქმევდი. ეს იყო სახელმწიფოში კანონის აღსრულების რიგითი ღონისძიება. ეს არის სახელმწიფოებრიობის ერთ-ერთი დამახასიათებელი ნიშან-თვისება და ოპოზიციურ პარტიად წოდებული ამას ებრძოდა. მათთვის სამწუხაროდ, 23 თებერვალს, წითელი არმიის დაარსების დღეს პუტინს, გავრილოვს, თემურ ალასანიას თუ მიხეილ სააკაშვილს ეს საჩუქარი არ აღირსა ქართულმა სახელმწიფომ. ყოველგვარი სისხლისღვრის, ძალადობის თუ სხვა ტიპის ღონისძიებების ჩატარების გარეშე აყვანილ იქნა ადამიანი, რომელმაც საკუთარ თავს გაუხსნა საკნის კარები. მან სპეციალურად, დემონსტრაციულად ფეხქვეშ გათელა კანონის მოთხოვნა და „გაიჩალიჩა“ იქ ყოფნა, რადგან მას ჰქონდა შესაძლებლობა, გარეთ ყოფილიყო.
როგორ შეიძლება, ნიკა მელიას საქციელები შევადაროთ შინდისის ბიჭების გმირობას, არჩილ ტატუნაშვილის გმირობას?! ის, რასაც ჩვენ პირდაპირ ეთერში ვუყურებდით ამ დღეების განმავლობაში, იყვნენ სოროში შემძვრალი მღრღნელები, რომლებიც იცავდნენ თავიანთ პატარა ვირთხას. დღეს ის არც მოქალაქეა, რადგან სახელმწიფოს არ სცემს პატივს და არც გმირია, ვინაიდან შემოისაზღვრა ქალბატონებით, გოგონებით. რანაირი გმირია?! გმირი კი არა, კურდღელია, სამწუხაროდ.
არსებობენ ძალები, რომლებსაც აღიზიანებთ ქვეყნის დამოუკიდებლობისკენ და გაძლიერებისკენ სწრაფვა. მუდმივად მიდის მცდელობა, რომ საქართველო არშემდგარ სახელმწიფოდ წარმოაჩინონ, ჩამოშალონ მისი ძირითადი სახელმწიფოებრივი ინსტიტუტები, თავისივე ჩანერგილი აქტივისტების ხელით საბოტაჟის რეჟიმში გადაიყვანონ სახელმწიფო. მელია არის თოჯინა, მარიონეტი იმ ძალის ხელში, რომელმაც გამოარჩია ამ როლის შესასრულებლად და მისი მეშვეობით შეეცადა, 23 თებერვალს რუსეთისთვის საჩუქარი გაეკეთებინა, რადგან ქვეყანა უსუსურად წარმოეჩინა“, – განაცხადა ქართველიშვილმა.
