გიორგი შერმადინის „ტენერიფეს” ქართველი ცენტრი ესპანეთის საკალათბურთო ჩემპიონატის გიგანტად დაასახელეს, – ინფორმაციას კალათბურთის ფედერაცია ავრცელებს.
ფედერაციის ცნობით, ესაა ესპანეთში ერთ-ერთი ყველაზე პოპულარული ჟურნალ Gigantes ყოველწლიური დაჯილდოვება, რომელიც 33-ედ ჩატარდა. გასულ, 2020 წელს აღნიშნულმა ჟურნალმა ლიგა ენდესას წლის გიგანტად იმჟამად ესპანურ “ბასკონიაში” მოთამაშე თორნიკე შენგელია დაასახელა.
აღსანიშნავია, რომ შერმადინი გასული, 2020 წლის ლიგა ენდესას საუკეთესო მოთამაშედ თავად ამ ლიგის ხელმძღვანელობამ დაასახელა. მიმდინარე სეზონში გიორგი შერმადინი საშუალოდ 24.38 წუთს თამაშობს და 17.3 ქულას, 5.8 მოხსნას, 2.4 პასს და 1 ჩაჭრას აგროვებს. ასეთმა შედეგიანობამ შერმადინს მიმდინარე სეზონში უკვე მეორედ მოუტნა თვის (ოქტომბერი, იანვარი) MVP-ის ტიტული. რაც ყველაზე მთავარია, შერმადინი ერთპიროვნულად და დიდი უპირატესობით ლიდერობს საშუალოდ მოგროვებულ სარგებლიანობის ინდექსით. მისი მონაგარი მატჩში საშუალოდ 23.3-ია, როცა მეორე ადგილზე მყოფ მადრიდის რეალის ცენტრ ედი ტავარეშის ეს მაჩვენებელი 18.7-ია.
სწორედ ტავარეში დასახელდა 2020 წლის გიგანტ მამაკაცად. ჟურნალმა არაერთ ნომინაციაში გამოავლინა საუკეთესონი, რომელთაგანაც რამდენიმე საინტერესო პრიზის ავტორს გთავაზობთ:
ლუკა ვილდოზა (ბასკონია) – წლის ლათინოამერიკელი
პიერია ანრი (ბასკონია) – წლის ახალწვეული
უსმან გარუბა (რეალი) – წლის დამცველი
ხოან პენაროია (ბურგოსი) – წლის მწვრთნელი
ფრანჩესკ სოლანა (ლერიდა) – წლის სპორტული დირექტორი.
