მეუფე პეტრე კვლავ განიკურნება. უძღები შვილი დაბრუნდება, – ბრძანა სრულიად საქართველოს კათალიკოს-პატრიარქმა ილია მეორემ ქადაგებისას.
მან მრევლს მირქმის დღესასწაული მიულოცა და აღნიშნა, რომ ლოცულობენ მეუფე პეტრესა და სხვა შეცდომილი მოძღვრებისთვის.
„ამ ბოლო დღეებში დიდი განსაცდელი იყო ეკლესიაში, მაგრამ უნდა გვახსოვდეს, რომ, როცა განსაცდელი ეძლევა ადამიანს, ძალა, მადლიც ეძლევა. მეუფე პეტრე ჩვენ გავზარდეთ როგორც საკუთარი შვილი, მაგრამ მოხდა განსაცდელი. ჩვენ უნდა ვიცოდეთ, რომ არავითარი ცოდვა არ აღემატება ღვთის წყალობას. სინანული და აღსარება კურნავს ადამიანს და ჩვენ დარწმუნებული ვართ, რომ სინანული დაისადგურებს ჩვენს გულებში, გონებაში და მეუფე პეტრე კვლავ განიკურნება. უძღები შვილის მამა გადიოდა გზაზე და ელოდებოდა თავის შვილს. ასევე ველოდებით ჩვენც შეცდომილ შვილებს. ჩვენ ვლოცულობთ მეუფე პეტრესა და სხვა შეცდომილი მოძღვრებისათვის, წყალობა და მშვიდობა განკურნავს მათ. დღეს არის განწმენდის დღე; დღეს არის ის დღე, როცა შვილები ლოცავენ თავიანთ მშობლებს. თქვენც დალოცეთ თქვენი მშობლები და ისინი დაგლოცავენ თქვენ“, – ბრძანა პატრიარქმა.
