გარდაცვლილი 14 წლის გოგოს ოჯახმა ექსპერტიზის დასკვნა დღეს მიიღო. ექსპერტიზა ადასტურებს, რომ მოზარდი სასტიკად იყო ნაცემი. ინფორმაციას ტელეკომპანია „მთავარი“ ავრცელებს. ახლა წესით ის უნდა დადგინდეს, ვინ იძალადა ფიზიკურად ნინიზე – 23 წლის ნ.ტ.-მ, რომელსაც ოჯახი გაუპატიურებაში სდებს ბრალს თუ ნათესავებმა, რომლებმაც გადაწყვიტეს, რომ არასრულწლოვანი ასე უნდა დაესაჯათ.
არასრულწლოვნის დედას გამოძიების იმედი არ აქვს, მაგრამ პოლიციაში საჩივრის შეტანას აპირებს. მას მოზარდის ბაბუასთან დაძაბული ურთიერთობა აქვს და შვილთან გამოსამშვიდობებლადაც მხოლოდ დაკრძალვის დღეს მიუშვეს. მერი რომანაძე ითხოვს, რომ პასუხისგებაში 23 წლის ნ.ტ.-ს გარდა, არასრულწლოვნის ბაბუა და ბიძაც მიეცნენ. ის ჯერ ვერაფერს ამტკიცებს, თუმცა ფიქრობს, რომ მისმა შვილმა თავი არ მოიკლა და ის ბაბუას შემოაკვდა, რადგან მისი მხრიდან ფიზიკური ძალადობის მსხვერპლი არაერთხელ ყოფილა.
„ბავშვს მოუყოლია ყველაფერი და შენ როგორ გვაჭამე სირცხვილიო, სცემეს უმოწყალოდ. იმ დღეს დამელაპარაკა ბავშვი, დედიკო, თავზე ხელს ვერ ვიკიდებ, სულ გაწითლებული მაქვსო, ბალიშზე თავს ვერ ვდებ, ზურგი და ხელები მტკივაო… მე ვფიქრობ, ამ კაცს [მამამთილს] მთვრალს შემოაკვდა“, – აცხადებს მერი რომანაძე.
