უხვი ნალექის შედეგად გააქტიურებულმა მეწყრულმა პროცესებმა, ამბროლაურის მუნიციპალიტეტის სოფელ ზედა ღვარდიასთან, კლდოვანი მასის ჩამოშლა გამოიწვია, რის გამოც სოფელთან მისასვლელი გზა ჩაიკეტა, – ამის შესახებ ინფორმაციას ამბროლაურის მუნიციპალიტეტის მერია ავრცელებს.
მათივე ინფორმაციით, სტიქიის ადგილზე სახელმწიფო რწმუნებულის მოვალეობის შემსრულებელი გიორგი მაქარაშვილი, ამბროლაურის მუნიციპალიტეტის მერი, ზვიად მხეიძე და საკრებულოს თავმჯდომარე, ასლან საგანელიძე შესაბამის სპეციალისტებთან ერთად იმყოფებოდნენ.
ოპერატიული ინფორმირების საფუძველზე, ხვალიდან აღნიშნულ პროცესებში გეოლოგიის დეპარტამენტი ჩაერთვება. სპეციალისტების მიერ მოხდება სიტუაციის შეფასება და რისკების განსაზღვრა, რის საფუძველზეც დაიწყება გაწმენდითი სამუშაოები.
ადგილობრივ მოსახლეობას პროდუქტი და პირველადი საჭიროების ნივთები გაეგზავნათ. მათთან მუდმივ კონტაქტზე იმყოფებიან მუნიციპალიტეტის წარმომადგენლები. შემთხვევის ადგილზე მობილიზებულია ტექნიკა და შესაბამისი სამსახურები. შექმნილია ,,სტიქიის სალიკვიდაციო ჯგუფი“.
