არასამთავრობო ორგანიზაციამ „სამართლიანი არჩევნებისა და დემოკრატიის საერთაშორისო საზოგადოებამ“ 2020 წლის საპარლამენტო არჩევნების საბოლოო ანგარიშში განაცხადა, რომ წინასაარჩევნო პერიოდში გამოვლენილმა ზეწოლის/მუქარის/მოსყიდვისა და ადმინისტრაციული რესურსის გამოყენების ფაქტების სიმრავლემ, საარჩევნო კომისიებში მმართველი პარტიის დომინირებამ, კენჭისყრის შედეგების შეჯამების დროს შემაჯამებელ ოქმებში დაფიქსირებულმა დისბალანსებმა „მნიშვნელოვნად შეამცირა საარჩევნო პროცესის მიმართ ნდობა“.
ორგანიზაციამ აღნიშნა, რომ მმართველი პარტიის წარმომადგენლები, მათ შორის, ადგილობრივი ხელისუფლების წარმომადგენლები წინასაარჩევნო პერიოდში მოსახლეობას სოციალურ დახმარებას ურიგებდნენ, რამაც, თავის მხრივ, წაშალა ზღვარი მმართველ პარტიასა და სახელმწიფოს შორის.
ანგარიშში ასევე აღნიშნულია, რომ „სკოლები და მათი ადმინისტრაცია, კვლავ, პოლიტიზაციის მაღალი ხარისხით გამოირჩეოდა“, მიუხედავად საარჩევნო კანონმდებლობაში განხორციელებული ცვლილებისა, რომლის საფუძველზეც, საჯარო სამართლის იურიდიული პირების თანამშრომლებს აგიტაციაში მონაწილეობა აეკრძალათ.
ორგანიზაციის ცნობით, ფიზიკური დაპირისპირება და მუქარა, განსაკუთრებით რეგიონებში, საარჩევნო პერიოდში კვლავ გამოწვევად რჩებოდა. ამასთან, ადგილი ჰქონდა მაგაითად სოფელ ომალოში ახმეტის მუნიციპალიტეტში ერთიანი ნაციონალური მოძრაობის დამკვირვებლებზე ზეწოლის მცდელობას, კერძოდ კი რამზან ალხანაშვილის იმართ ძალადობრივ ქმედებებს. „მნიშვნელოვან პრობლემას წარმოადგენდა ქალი კანდიდატების, ეროვნული უმცირესობების მიმართ არაკეთილგანწყობილ გარემოს, რაც, ხშირად, გამოიხატებოდა სოციალურ ქსელში მიმდინარე დისკრედიტაციითა და მუქარით“, – ნათქვამია ანგარიშში.
2021 წელი 12 იანვარი
