„სოფო კილაძის ქმარი ჩემთან იყო მოსული, ძალიან მძიმე მდგომარეობაში იყო…“

საქართველოს პარლამენტის წევრი, ეკა ბესელია ამბობს, რომ მისი კოლეგის, სოფო კილაძის ქმარმა მას დახმარების თხოვნით მიმართა. კილაძის ქმარი ოჯახის წევრის მიმართ გამოწერილი შემაკავებელი ორდერის დაღვევის მუხლით დაკავებულია და პატიმრობა შეეფარდა. ბესელიას თქმით, კაცი დაპატიმრებამდე მის ოფისში იყო მისული.

„თქვა, რომ არავინ არ უსმენდა და ყველა კარი დაიკეტა მისთვის, ვინც გაიგო, რომ ის სოფო კილაძის მეუღლე იყო. ამბობდა, რომ ძალიან მძიმე მდგომარეობაში იყო და ბავშვს ვერ ნახულობდა და ამას ძალიან განიცდიდია. თქვა, რომ სასამართლო და შესაბამისი ორგანოები ეხმარებიან კილაძეს სტატუსიდან და მდგომარეობიდან გამომდინარეო… აი, რას ითხოვდა იცით? დამიდექით გვერდითო“, – უთხრა „ტვ პირველს“ ბესელიამ.

ბესელიამ განმარტა, რომ კაცს უარი უთხრა დახმარებაზე: „არ ვისურვე, რომ ამ თემებში ჩავღრმავებოდი. არ მინდა ვინმეს განცდა დარჩეს, არ ვარ იმ ადამიანზე [სოფო კილაძე] მაღალი წარმოდგენა და ეს თემა გამოიყენე განწყობების დასამძიმებლად“, – თქვა ბესელიამ.

ცნობისთვის: სოფო კილაძის ქმარს სასამართლომ 4 ივნისს პატიმრობა შეუფარდა. სოფო კილაძეზე ყოფილი ქმრის მხრიდან ძალადობის შესახებ ინფორმაცია მედიაში გასული წლის ნოემბერში გავრცელდა. თავად დეპუტატი ძალადობის ფაქტს ადასტურებდა.